الرهاوي
ياهل العرف راس ابليس تحت الصفاه
والمزون اردمت يامثقل اخيالها
من حظر للمعارك لايقصر رشاه
من برك للحمول اليوم يشتالها
معدي
الثمر يالرهاوي مصدره من نواه
والكحيله علامه ضاع خيالها
الخبر ناقلينه من كلام الرواه
جتني علوم فال الله ولا فالها
الرهاوي
النت لاتحسبنك شيخ عند القضاه
الرساله تبين ان جاك مرسالها
كل شاعر يعرف الخط لامن قراه
ماتحاسب اوادم كود بعمالها
معدي
انتبه من بليس اللعين وهواه
واللحون الجديده هات موالها
كل علم قديم لا تباحث خفاه
والجبال الطويله مالك ومالها
الرهاوي
يامعدي مادامك ماسك الاتجاه
دلة الكيف ساق الوسم فنجالها
لايغرك نسيم الليل قبل الصلاه
او نفسك تمشيها على حالها
معدي
صار وجه الحقيقه مايباعد قفاه
وشفت ناس ن تحذف اليوم معدالها
الحرامي علامه طامع ن بمحماه
مادرى ان المساوي ماسك خلالها
الرهاوي
كان ذي نظرت معدي قريب ن داوه
العرب تفدي الاحوال في مالها
لاتسوق المطيه عند خشم الرعاه
دام لك نظرتن فيها وفي خالها
معدي
الرهاوي كحل عينه وسبب عماه
واليدين الطويله قصرت حبالها
مرتكي مثل ضلع النير هو والسراه
كان لك حيلة ن بالوقت فاحتالها
الرهاوي
انت منتة مذيع ن و سط ذيك القناه
انت شاعر تمشيها على فالها
من نزل في طريق السيل فاالسيل جاه
ومن تجنب عن الاخطار ماجالها
معدي
كل برق ن قدم عينك يلوح بسناه
اردف المزنه اللي جاك همالها
وكل ذيب براس الرجم نسمع عواه
يوم بعض العرب كد ضاعت افعالها
الرهاوي
شفت برقن يلوح ولا شرب رجل ماه
يا بروق ن تلوح ولا ورد جالها
الرهاوي عن الدسمه ماتقصر يداه
له مواقف ماتنساء ضلل اضلالها
معدي
الرهاوي بتالي الوقت قصرت خطاه
حالته ماتسر القوم يرثا لها
دام حبه على ماقيل وسط الرحاه
لو نفسه تريح يمكن اشوا لها
الرهاوي
الرهاوي رهاوي مير دور رضاه
ماوقف قدم باب الناس وومالها
كان دارت رحا الموقف مادارت علاه
مابنا خيمته والعصر مشتالها
معدي
جيت تبغى الغناه ولا لقيت الغناه
رحت بالسلعه اللي ضاع دلا لها
الرضاء لله المعبود ثم الولاه
وانت عدل شماغك واوزن عقالها
الرهاوي
الغنا عند رب البيت والي عطا ه
والقنا عه كنوز ن ما فنا مالها
من ذكر سالفت موسى ماينسا عصاه
القصص موعضه والعبره اخلالها
معدي
العصى يالرهاوي شرشحت بالطغاه
والبحور العميقه جاك زلزالها
انتبه للبحر ماعاد فيها نجاه
اخر الوقت نفسك جا من اغتا لها
:::::::::::::::::::::
